螢幕快照 2016-01-23 上午1.42.44

【世間上娛樂不少更好質素】《Party無限耆》

這可以是一齣很好笑的電影-如果你喝醉了或嗨了的話。如果你返工好辛苦,放咗工唔想用腦,想乜都唔諗大笑一場的話,呢套電影幫你唔到。

大家有無睇《2 Broke Girls》?雖然我追到Seaon 5都仲有睇,但無可否認,成套劇幾乎都靠one liners撐住,主線劇情幾乎毫無推進,好似求其作個problem of the week就拍一集咁。《Party無限耆》(Dirty Grandpa)就好似電影版嘅《2 Broke Girls》,係,有啲對白係好笑,有啲畫面係好笑,但都不外乎屎尿屁搞嘢搞嘢毒品毒品,屬唧你笑系列,幽默固然唔到,爆笑又未到,全院滿座,但真係哄堂大笑嘅次數好似唔過5次;而且不知是剪接還是劇本問題,全片碎濕濕,好似臨收鋪唔夠河粉求其用啲河粉碎炒碟牛河俾埋你咁,節奏極怪,one liner同賤格對白就好似星星碎糖,偶然咬到係開心嘅,但你曬喺個焗燶咗嘅cupcake上面,都救唔返件事。(講起怪,其實連鏡頭同角度都好怪,一開頭有啲扮舊相嘅片段,好耐無喺荷里活製作見到咁假嘅畫面,同埋咁一般嘅笑片)

全片角色與劇情的深度,薄得猶如condom,角色的自相矛盾與心態轉變之大,令人摸不著頭腦。前段懶係wild,走《Hangover》嗰種adult comedy路線,但後段劇情預料之中都算,老土到好似straight to video嘅chic flick一樣,然後全幕節奏拖拉,又dry又怪;跟住高潮戲(supposed係)更加令人懷疑編劇突然決定「好啦跟住呢場我地試吓完全無視常理咁寫啦」,荒謬到好似spoof一樣,如果全套都係走呢個路線反而okay,依家只令人覺得落雨收柴是但啦算數啦完場㗎啦。

導演似乎不甘心只拍一個瘋狂故事,係都要加啲教育意義落去,唔係唔得,但係眼高手低。另外加上始終文化唔同,好多笑位唔啱香港,不過字幕睇得出好用心,譯得好地道,笑位都好有心譯,連「亞視永恆」都有,譯者應該叫吳加,係抵讚嘅,不過素材所限,雖然已經譯得好好,但真係唔太好笑。另外Zac Efron係好性感嘅,有一幕仲幽咗《High School Musical》一默,好可惜瑜不掩瑕;同羅拔狄尼路有對手戲女配角好搶戲,我寧願唔要Zac Efron條愛情線,講多狄尼路同個女仔好過。

早前Zac Efron上《The Ellen Show》宣傳《Dirty Grandpa》,話羅拔狄尼路係自己偶像,幾乎睇過哂對方作品,不過問題係自己戲狄尼路一套都無睇過,因為佢可以睇邊套呢?唔通睇《High School Musical》咩?雖然當時Zac只係幽自己一默,但係Sorry,Zac,《Dirty Grandpa》先係你唔應機俾羅拔狄尼路睇戲。

#Party無限耆 #DirtyGrandpa #ZacEfron #RobertDeNiro #2BrokeGirls