2016 年 我的十大 by Bluerayk

《今生不回家》 周國賢

好早我就決定周爸爸呢首歌一定係小弟的2016至尊。事關面對香港今年多不勝數的荒謬,呢度已經陌生得好似我先係新移民咁,而周爸爸呢份詞實在講得太中我心裡面的感覺。
「曾以為有家就是安穩
當天氣改變世道人心
再溫馨 都感覺 似被幽禁
至發現 城牆外面 曠野那天空 不算暗」
每次聽住呢首歌都覺得好心UP,點解呢個地方會搞成咁,搞到個個都想移民……
係咪就怪「當日為何無力勇敢」?係咪真係今生都已經唔可能番到真正的家?即係從前美麗的香港….

《哪裡只得我共你》 Dear Jane

又係時候港豬MODE~ 呢首歌畀YOUTUBE FEED左我聽成年,但又真係幾好聽,所以不得不讚個MV真係拍得幾好,個個都話SURPRISE佢可以將個後巷拍得咁靚~

《親愛的黑色》 何韻詩

HOCC今年的CONCERT一定係近年最好睇,最INSPIRING的一個PERFORMANCE~ 咁呢首主題曲當然會成功小弟的最愛啦~ 🙂

《山林道》 謝安琪

「毋忘初衷」:)

《銀髮白》 林二汶/岑寧兒

2016的一首天籟,係現場聽林二汶同岑寧兒唱,毛管戙咗3分鐘,佢兩個把聲真係好屈機~!!!!!

《強弱》 鄧小巧

鄧小巧呢隻碟又係今年必買的。而咁多首我最愛呢首,成份詞就係不停提自己「放低身段」的重要,有時要走出困局,可能欠的就一下承認自己的軟弱……
「願你記得軟弱沒有錯
痛亦沒有錯
要投降方知可以被援助
如此際 想變更強嗎
請你允許你 真心痛過
強大因你 不怕赤裸裸」

《你不是一個人》 梁詠琪

作為好勝GIGI的FANS,今年佢兩首歌都好OK~ 尤其係呢首《你不是一個人》,但偏偏廣東話版的《紅棉道上》份詞就畀林若寧填到唔三唔四,G明明GIGI首歌的目的就係想鼓勵聽眾你唔係一個人….
「你不是一個人 面對寂寞
你不是一個人 呼吸空氣的稀薄
你不是一個人 因為有我
陪你 克服 軟弱」
好清晰,right? 林若寧就寫到咁…
「誰人與你見證花開幾轉
誰人與你到老所有結局難預算
誰人與你到死終生取暖
喜怒 苦樂 共存」
其實DEPRESS緊的人好容易就可以將呢份詞interpret做︰鬼有人同你看花、唔會有人陪你到老架啦~
真係畀林若寧激死…..

《卜卜卜》 Lil’ Ashes小塵埃

我諗香港樂壇係應該多一點好似小塵埃的清新音樂,而呢首《卜卜卜》又的確係幾入腦,所以都好希望佢攞到叱吒十大啦~

《無表面傷痕》 鄭欣宜

當全部人都讚頌緊《女神》的時候,請容許我港豬一下去推介欣宜的情歌 《無表面傷痕》。唔係我唔鍾意《女神》,而係當我第一次聽到 《無表面傷痕》我就唔知點解愛上佢的音樂,其實欣宜今年呢隻大碟真係好好,好值得儲~

《我唔係死蠢》 明福俠

我諗我對廣東話快歌都仲有一丁點的期望,所以聽到明福俠呢首玩味之作,雖然比起全盛時期還不算有什麼特出,但仍為佢係PLAYLIST留番一個位置。至少比起鄭經理今年的快歌也算是出色得多了,歌詞及編曲都合格有餘。